ᓇᐦᐱᑐᐣ ᐃᐁᐧ ᒋᐊᓂ ᐊᐧᐸᐣᑕᒪᐣ
ᐃᔑ ᓂᑲᐣ ᑫᐊᓂᑐᑕᒪᐣ. ᑲᐃᓀᐣᑕᒪᐣ ᒋᑲᑫᐧ ᑌᐱᓇᒪᐣ.
ᑫᑯᓀᐣ ᐃᐁᐧ ᓂᑲᐣ ᐃᓇᐱᐣ ᑲᐃᒋᑲᑌᐠ?
ᓂᑲᐣ ᐃᓇᐱᐣ, ᑲᐃᑭᑐᒪᑲᐠ “ᑫᑯᐣ ᑲᐱᒋᑲᑌᐠ” ᐊᓂᔑᓂᓂᒧᐃᐧᓂᐠ ᓀᑫ, ᐊᓂᔑᓂᓂ ᑫᐃᐧᒋᐦᐃᑯᐨ, ᒥᓯᐁᐧ ᑲᐅᒋ ᑲᓇᐊᐧᐸᐣᒋᑲᑌᐠ ᑲᐃᐧᒋᑲᐸᐃᐧᑕᐊᐧᑲᓄᐊᐧᐨ ᐅᐡᑲᑎᓴᐠ ᑲᐊᓂ ᑭᔑᑭᐊᐧᐨ ᐃᒪ ᑲᐅᒋ ᑲᓇᐁᐧᐣᑕᑯᓯᐊᐧᐨ (ᐊᑯᓇᐠ 26) ᐃᒪ ᑎᑭᓇᑲᐣ 30 ᐃᐡᑯᓂᑲᓂᐠ ᑲᐅᒋ ᑎᐯᐣᑕᑯᓯᐊᐧᐨ.
ᐃᐧᒋᐦᐃᐁᐧᐃᐧᓇᐣ ᑲᐸᑭᑎᓇᒪᐠ
ᓂᑲᐣ ᐃᓇᐱᐣ ᑭᑲᑭᐃᐧᒋᐦᑯᐠ ᐊᓂᔑᓂᓂ ᑫᔑ ᐃᐧᒋᐦᐃᑯᐨ, ᒥᓯᐁᐧ ᑲᐅᒋ ᑲᓇᐊᐧᐸᐣᒋᑲᑌᐠ ᑲᐃᐧᒋᑲᐸᐃᐧᑕᐊᐧᑲᓄᐊᐧᐨ ᐅᐡᑲᑎᓴᐠ ᑲᐊᓂ ᑭᔑᑭᐊᐧᐨ ᐅᒋ. ᑲᐃᐧᒋᐦᐃᑯ ᒋᓇᓇᑲᒋᑐᔭᓂᐣ ᑕᓯᐣ ᐃᐧᒋᐦᐃᑯᐃᐧᓇᐣ ᑫᑯᓇᐣᑕᐁᐧᐣᑕᒪᐣ ᒋᑭ ᐅᒋ ᑲᐡᑭᑕᒪᓱᔭᐣ ᑫᑯᓇᐣ ᒥᓇ ᐃᒪ ᒋᐅᒋ ᐊᐸᒋᑐᔭᓂᐣ ᑲᑕᑲᐧᑭᐣ ᐃᐧᒋᐦᐃᐁᐧᐃᐧᓇᐣ ᐃᒪ ᑭᑕᔑᑫᐃᐧᓂᐊᐧ. ᓂᐃᐧᐣᑕᒪᑫᒥᐣ ᐊᔭᑲᐧᒥᓯᐃᐧᓇᐣ, ᑲᓇᐁᐧᓂᒥᑎᓱᐃᐧᐣ, ᒥᓇ ᑫᔑ ᒪᐡᑲᐃᐧᑲᐸᐃᐧᔭᐣ ᒋᑭ ᑲᐡᑭᑕᒪᓯᔭᐣ ᑫᑭ ᐅᒋ ᐱᒪᒋᐦᐅᔭᐣ ᐃᔑᓂᑲᐣ ᑫᐊᓂ ᐸᐱᒪᑎᓯᔭᐣ. ᐅᐁᐧ ᓂᑭᑭᓄᐦᐊᒪᑫᐃᐧᓂᓇᐣ ᐁᐧᐣᑕᐣ ᐊᐃᐧᔭ ᒋᑭ ᑌᐱᓇᐣᐠ ᒥᓇ ᒋᑭ ᓂᑲᓇᑐᔭᐣ ᑎᐱᓇᐁᐧ ᑫᐃᐧᒋᐦᐃᑯᔭᓂᐣ.
ᐊᐊᐧᓀᐣ ᑫᑭ ᐊᐸᒋᑐᐨ
ᐃᐁᐧ ᓂᑲᐣ ᐃᓇᐱᐣ ᐱᒧᒋᑫᐃᐧᐣ ᐅᐃᐧᒋᑲᐸᐃᐧᑕᐊᐧᐣ ᐅᐡᑲᑎᓴᐣ ᒣᑲᐧᐨ ᓇᐣᑕ ᒥᓇ ᐅᑕᓇᐣᐠ ᑲᑭᔑ ᐱᑲᓇᐁᐧᐣᑕᑯᓯᐊᐧᐨ ᑎᑭᓇᑲᐣ ᐊᐊᐧᔑᐡ ᒥᓇ ᑎᐯᐣᒋᑫᐃᐧᐣ ᐱᒧᒋᑫᐃᐧᐣ. ᐅᓇᒋᑫᐃᐧᓇᐣ ᑕᒪᒋᒋᑲᑌᐊᐧᐣ 17 ᑕᓱᐱᐳᓀᔭᐣ ᒥᓇ ᑲᔦ ᐃᐧᒋᐦᐃᐁᐧᐃᐧᓇᐣ ᑕᐊᐧᔭᐣ ᒣᑲᐧᐨ ᐊᓂ ᐱᒥ ᒪᒋ ᐱᒋᓂᐡᑲᔭᐣ ᐊᓂᑭᔑᑭᔭᐣ ᐊᑯᓇᐠ 26 ᑕᓱᐱᐳᓀᔭᐣ. ᐃᐁᐧ ᓂᑲᐣ ᐃᓇᐱᐣ ᐱᒧᒋᑫᐃᐧᐣ ᐊᐃᐧᔭ ᐱᑯ ᐁᑕ ᐃᓀᐣᑕᐠ ᐅᑲᑭ ᐊᐸᒋᑐᐣ ᒥᓇ ᑲᐃᐧᐣ ᑕᑕᑲᐨ ᐅᓇᑯᓂᑫᐃᐧᓂᐠ ᑲᐃᓯᓭᐠ ᒥᓇ ᐊᐃᐧᔭ ᐃᓂᐠ ᒋᐅᑕᐱᓇᒪᐣ.
ᐁᔦᓇᓀᐤ ᑫᑯᓇᐣ ᑲᐅᒋ ᒪᐡᑲᐃᐧᑲᐸᐃᐧᒪᑲᑭᐣ ᓂᑲᐣ ᐃᓇᐱᐣ
ᐃᐁᐧ ᑲᐃᐧ ᐊᓂ ᒪᒋ ᐱᒪᑎᓯᓇᓂᐊᐧᐠ ᑲᐅᐡᑲᑎᓯᓇᓂᐊᐧᐠ ᓇᐱᐨ ᐁᐡᑲᑦ ᑯᐦᑕᓀᐣᑕᑲᐧᐣ, ᐁᓀᓭᓂᒧᓇᓂᐊᐧᐠ, ᒥᓇ ᑲᔦ ᐁᔑᑲᑌᐣᒋᑲᑌᐠ. ᔕᑯᐨ ᑕᐡ ᑲᔦ, ᓇᐣᑕ ᒥᓇ ᐃᒪ ᒋᑭ ᐊᓄᐣᒋ ᑭᑫᐣᒋᑲᑌᑭᐸᐣ ᐊᓂᐣ ᑫᐃᔑ ᐅᑦᐱᑲᐸᐃᐧᓇᓂᐊᐧᐠ ᒥᓇ ᑫᐊᓂᔑ ᒪᒋᐡᑲᓂᐊᐧᐠ.
ᑭᐃᐧ ᐃᐧᒋᐦᐃᑯ ᐅᐁᐧ ᑲᐃᐧ ᐊᓂᔑ ᐱᒥᔭᔭᐣ. ᐅᐁᐧ ᑲᐃᐧᑐᑕᒪᐣᐠ ᒥᓇᐧᔑᐣ ᐊᓂᔑᓂᓂ ᑫᔑ ᐃᐧᒋᐦᐃᑯᐨ, ᒥᓯᐁᐧ ᑲᔑ ᑲᓇᐊᐧᐸᐣᒋᑲᑌᐠ ᒥᓇᐧᒋᐦᐃᑯᐃᐧᓯᐃᐧᓂᐠ ᒥᓇ ᐅᐡᑲᑎᐡ ᑫᔑ ᐃᐧᒋᐦᐃᑯᐨ, ᒥᓇ ᑲᔦ ᒋᐅᒋ ᔑᐣᑭᒪᑲᓄᐊᐧᐨ ᐃᑫᐧᓂᐊᐧᐠ ᑲᐃᐧᒋᑕᐧᐊᐧᐨ ᑲᑭᓇ ᐃᒪ ᑲᐃᐧᔑ ᒪᒋᐡᑲᔭᐣ. ᑭᐃᐧ ᒥᓂᑯ ᑫᐃᐧᒋᐦᐃᑯᔭᓂᐣ ᒋᑭ ᑲᐡᑭᑕᒪᓯᔭᐣ ᓂᑲᐣ ᑲᐃᐧ ᑲᑫᐧ ᑌᐱᓇᒪᓯᔭᐣ ᒥᓇ ᑲᔦ ᓂᑲᐣ ᑲᐃᐧ ᐊᓂ ᐊᐸᒋᑐᔭᐣ.
ᐃᒪ ᑲᑭ ᐅᒋ ᒪᐡᑲᐃᐧᑲᐸᐃᐧᒪᑲᑭᐣ ᓂᑲᐣ ᐃᓇᐱᐣ ᐁᔦᓇᓀᐤ ᑫᑯᓇᐣ ᐊᔭᐊᐧᐣ - ᑲᐃᐧᒋᑲᐸᐃᐧᑕᑯᐊᐧᐨ ᐅᐡᑲᑎᓴᐠ ᒥᓇ ᑲᑭᔑᑭᐊᐧᐨ ᐅᐡᑲᑎᓴᐠ ᑲᓇᐣᑕᐁᐧᐣᑕᒧᐊᐧᐨ ᑲᐧᔭᐠ ᒥᓇ ᓂᐦᔑᐠ ᑲᐊᓂ ᐱᒥᔭᐊᐧᐨ ᑲᐱᒥ ᐊᐊᐧᔑᔑᐃᐧᐊᐧᐨ ᐱᓂᐡ ᑲᐊᓂ ᑭᔑᑭᐊᐧᐨ.
ᑲᓇᓇᐣᑕᐃᐧ ᑭᑫᐣᑌᑭᐣ ᑫᑯᓇᐣ ᑲᐃᐧᐣ ᐃᐦᐃᒪ ᐃᔑ ᑭᐱᒋᓭᓯᓄᐣ ᑲᐃᐡᐸᐠ ᐃᐡᑯᓄᐃᐧᑲᒥᐠ, ᒥᐱᑯᐦᐃ ᑭᔭᑦ ᑫᑐᑕᒪᐸᐣ ᑫᑯᐣ ᑭᔭᐸᐨ ᒋᓇᓇᐣᑕᐃᐧ ᑭᑭᓄᐦᐊᒪᑯᓯᔭᐣ ᐱᓂᐡ ᐊᓂ ᑭᒋᔭᐦᐊᐊᐧᑎᓯᔭᐣ. ᓂᑭᑫᐣᑕᒥᐣ ᑲᐧᔭᐠ ᒋᐊᓂ ᐃᓇᐸᑎᓯᔭᐣ ᐃᔑ ᓂᑲᐣ. ᑭᓇᐣᑕᐁᐧᓂᒥᑯ ᒋᒥᓄᓭᔭᐣ ᑭᑎᐡᑯᓄᐃᐧᓂᐠ ᒥᓇ ᒋᐊᓂ ᐅᑕᐱᓇᒪᓂᐣ ᑭᑭᓄᐦᐊᒪᑫᐃᐧᓇᐣ ᑫᐊᐱᒋᐃᐧᑐᐊᐧᓀᐣ ᐱᑯ ᒥᓇ ᑲᔦ ᒋᐊᔭᔭᐣ ᑫᐊᐸᒋᑐᔭᐣ ᑫᐃᐧᒋᐦᑯᔭᐣ ᐃᒪ ᑫᔑ ᑌᐱᓇᒪᓯᔭᐣ. ᐃᐁᐧ ᑲᔦ ᑲᐃᑕᒪᐣᐠ ᑭᑕᔑᓇᐯᐊᐧᑎᓯᐃᐧᐣ ᒥᓇ ᑲᔦ ᑭᑕᒐᑯᐱᒪᑎᓯᐃᐧᐣ.
ᐱᒪᑎᓯᐃᐧᐣ ᑲᐃᒋᑲᑌᐠ ᒪᐊᐧᐨ ᐊᐣᑭᑌ, ᒥᐦᐃᐁᐧ ᑲᐅᒋᓂᑯᔦᐠ ᒋᐊᔭᔭᐣ ᔓᓂᔭᐣ ᑫᐅᒋ ᐊᓱᐡᑲᑯᔭᐣ - ᒋᐅᒋ ᐊᔕᒥᑎᓯᔭᐣ ᒥᓇ ᒋᐅᑲᐯᔑᐃᐧᓂᔭᐣᐠ. ᑭᐃᐧ ᐃᐧᒋᐦᑯ ᒋᑭ ᑌᐱᓇᒪᓂᐣ ᐃᐧᒋᐦᐃᑯᐃᐧᓇᐣ ᒋᑭ ᑲᐡᑭᔭᐣ ᒋᐱᒪᒋᐅᐦᔭᐣ ᔓᓂᔭᓇᐣᐠ ᓀᑫ ᒥᓇ ᒋᐊᓂ ᑌᐱᓇᒪᓂᐣ ᑲᐃᓀᐣᑕᒪᐣ ᑲᐃᐧ ᐃᓇᓄᑭᔭᐣ ᒥᓇ ᑲᔑ ᐸᑯᓭᐣᑕᒪᐣ ᒋᑐᒪᓇᐣ. ᓂᓂᓯᑕᐃᐧᓇᒥᐣ ᐊᓀᐱᒋ ᒪᐡᑲᐊᐧᐠ ᐅᐁᐧ ᑲᐊᔭᑌᐠ, ᑕᐱᓇᑲ ᑲᐃᐧᐣ ᑲᑭ ᑲᐡᑭᑐᓯᐣ ᑯᑕᑭᔭᐣ ᑫᑯᓇᐣ ᑭᐡᐱᐣ ᐁᑲ ᐅᑫᐧᓂᐊᐧᐣ ᑭᐡᐯᐣ ᐁᑲ ᐊᔭᔭᐣ ᑫᐅᒋ ᐱᒪᒋᐦᐅᔭᐣ. ᒥᑕᐡ ᐅᐁᐧ ᑲᐅᒋ ᑭᒋᓀᐣᑕᑲᐧᐠ ᐊᐃᐧᔭ ᒋᑭᑭᐨ ᔓᓂᔭᓇᐣᐠ ᓀᑫ.
ᐃᒪ ᓀᑫ ᓂᑕᓂᔑᓂᓂᐊᐧᑎᓯᐃᐧᓂᓇᐣ ᒥᓇ ᓂᑐᑕᒧᐃᐧᓂᓇᐣ, ᓂᑌᐯᐧᑕᒥᐣ ᑲᑭᓇ ᐊᐃᐧᔭ ᐁᐅᑕᒐᑯᐱᒪᑎᓯᐃᐧᓂᐨ. ᑭᓇᐣᑕᐁᐧᓂᒥᑯ ᑭᐣ ᑭᐅᓀᐣᑕᒪᐣ ᐊᓂᐣ ᐊᐧᐃᔑ ᑲᓇᐊᐧᐸᐣᑕᒪᐣ ᑭᑕᒐᑯᐱᒪᑎᓯᐃᐧᐣ ᒥᓇ ᒋᑭᐁᐧ ᓇᓯᑲᒪᐣ ᑭᑕᔑᓇᐯᐊᐧᑎᓯᐃᐧᐣ ᑫᔑ ᓇᐦᐁᐣᑕᒪᐣ ᒋᑐᑕᒪᐣ. ᑭᒋᓀᐣᑕᑲᐧᐣ ᒋᑭᑫᐣᑕᒪᐣ ᐊᐣᑎ ᑲᑭ ᐱᐅᐣᒋᔭᐣ, ᐊᐦᑭᑲᐣᐠ ᑲᔦ, ᑭᑎᔑᑭᔑᐁᐧᐃᐧᐣ, ᒥᓇ ᑭᑕᔑᑫᐃᐧᐣ ᒥᓇ ᑲᐱᒥᑐᑕᒧᐊᐧᐨ.
ᐃᐁᐧ ᐃᔑᓇᐣᑕᐁᐧᐣᑕᑲᐧᐣ ᒋᑭ ᐅᒋ ᒥᓄᐱᒪᑎᓯᔭᐣ ᒋᐊᔭᔭᐣ ᐊᐣᑎ ᑫᔓ ᑲᐯᔑᐃᐧᓂᔭᐣ ᒥᓇ ᑲᔦ ᒋᐅᒋ ᒪᐡᑲᐃᐧᑲᐸᐃᐧᔭᐣ. ᑲᐃᐧᒋᐦᐃᑯ ᒋᑭ ᑌᐱᓇᒪᐣ ᑫᒥᓇᐧᔑᐠ ᒋᐅᒋ ᓇᓇᑲᑕᐁᐧᐣᑕᒪᐣ ᑭᑕᔑᑫᐃᐧᐣ ᑲᐱᒥ ᐊᔦᓯᓭᑭᐣ. ᑲᐃᐧᓂᓂᑯ ᐃᐁᐧ ᑲᐃᑕᒪᐣᐠ ᐁᑲ ᒋᐃᐧᒋᔭᒪᑕᐧ ᑭᑎᐯᐧᐣᒋᑫᐃᐧᓇᐣ ᓇᐣᑕ ᒥᓇ ᑲᑲᓇᐁᐧᓂᒥᑲᐧ. ᐃᐁᐧ ᔕ ᑲᐃᑕᒪᐣᐠ, ᒋᐅᒋ ᐊᓂ ᑭᑫᐣᑕᒪᐣ ᐊᓂᐣ ᑫᑭ ᐊᓂᔑ ᐱᒋᓂᐡᑲᔭᐣ ᐊᓂ ᐯᔑᑯ ᐱᒪᒋᐦᐅᔭᐣ, ᑕᑯ ᑲᔦ ᒋᑎᐸᓂ ᑲᐯᔑᐃᐧᓂᔭᐣ ᓇᐣᑕ ᒥᓇ ᑲᔦ ᒋᐊᓂ ᐅᑕᐱᓇᒪᓂᐣ ᑫᐊᐸᒋᑐᔭᐣ ᐃᒪ ᑭᑲᐯᔑᐃᐧᓂᐠ.
ᐃᑫᐧᓂᐊᐧᐠ ᑲᐃᐧᒋ ᐱᒪᑎᓯᒪᑕᐧ ᒥᓇ ᑭᑕᔑᑫᐃᐧᐣ ᒥᐦᐃᐁᐧ ᑲᔦ ᑎᑭᓇᑲᐣ ᐃᐧᒋᐦᐃᐁᐧᐃᐧᐣ ᒪᒪᐤ ᑲᓇᐁᐧᐣᑕᑯᓯᐃᐧᐣ. ᒪᐊᐧᐨ ᑭᒋᓀᐣᑕᑲᐧᐣ ᒋᐊᔭᐊᐧᑕᐧ ᑲᐃᐧᒋᐱᒪᑎᓯᒪᑕᐧ ᑫᐅᒋ ᓇᒋᐸᐦᐃᐊᐧᓇᑕᐧ ᓇᐣᑕᐁᐧᐣᑕᒪᐣ ᐃᐧᒋᐦᐃᑯᐃᐧᐣ. ᐊᑎᐟ ᐊᐃᐧᔭᐠ, ᐅᑕᔭᐊᐧᐊᐧᐣ ᐊᐃᐧᔭᔑᔕᐣ ᑫᐅᒋ ᐃᐧᒋᐱᒪᑎᓯᒪᐊᐧᐨ. ᑲᐃᐧᒋᑲᐸᐃᐧᑕᑯ ᐅᐁᐧ ᒋᑭ ᑌᐱᒪᓂᐣ ᑲᒥᓇᐧᔑᑭᐣ ᐃᐧᒋᐃᐧᑎᐃᐧᓇᐣ ᒥᓇ ᑯᑕᑭᔭᐣ ᐃᐧᒋᐦᐃᐁᐧᐃᐧᓇᐣ.
ᐅᐁᐧ ᑲᑭᔑᑭᔭᐣ, ᑭᓇᐣᑕᐁᐧᐣᑕᑯᐡ ᑭᓂᑯ ᑲᐧᔭᐠ ᒋᐱᒥ ᑲᓇᐊᐧᐸᐣᑕᒪᐣ ᑭᒥᓄᔭᐃᐧᐣ. ᑲᐃᐧᓂᓂᑯ ᑲᐃᒋᑲᑌᐠ ᑭᓀᐦᑕ ᒋᐊᓄᑲᓂᑎᓱᔭᐣ. ᑭᐱᒥ ᐃᐧᒋᐦᐃᑯ ᐊᓂᓂᑯ ᑫᔑ ᓇᐣᑕᐁᐧᐣᑕᒪᓂᐣ ᐃᐧᒋᐦᐃᑯᐃᐧᓇᐣ, ᐊᓂᐣ ᑲᔦ ᑫᔑ ᐊᓄᑲᑕᒪᐣ ᑭᑭᒋ ᒪᒋᓭᐃᐧᓇᐣ, ᒥᓇ ᑲᔦ ᐁᑲ ᒋᐅᒋ ᐅᓇᔓᐊᐧᓂᑯᔭᐣ ᐃᐁᐧᓂᐊᐧᐣ ᐅᒋ. ᒥᓇ ᑲᔦ ᒋᐅᓇᑕᒪᑯᔭᐣ ᐃᓇᐣᒋᑫᐃᐧᐣ, ᑲᒥᓂᑯ ᑫᑭᐣ ᒋᑌᐱᓇᒪᓂᐣ ᐃᐧᒋᐦᐃᑯᐃᐧᓇᐣ ᑲᐱᒥᓭᑭᑌ ᒥᓇ ᑫᒥᓂ ᑐᑕᑯᔭᐣ ᑭᐱᒪᑎᓯᐃᐧᓂᐠ ᐃᔑᓂᑲᐣ. ᓇᐣᑕ ᒥᓇ ᑲᔦ ᑲᑫᐧᒋᐃᐧ ᐊᐸᒋᑕᑲᓇᐣ ᒥᓇ ᑲᔦ ᓇᐣᑕᐁᐧᐣᒋᑫᐃᐧ ᐊᐸᒋᑕᑲᓇᐣ, ᒥᓇ ᑲᔦ ᒋᑌᐱᓇᒪᓂᐣ ᐊᐧᓂᐦᐃᑫᐃᐧ ᐊᐦᑭᐣ.
ᑭᓇᐣᑕᐁᐧᐣᑕᑯᐡ ᑫᑭᐣ ᒋᑭᐦᑌᓂᒥᑯᔭᐣ ᒥᓇ ᒋᐅᒋ ᒪᐡᑲᐃᐧᓯᔭᐣ ᐃᐁᐧ ᑲᑲᑫᐧ ᑌᐱᓇᒪᓂᐣ ᑲᐃᐧᑐᑕᒪᐣ ᐃᒪ ᑭᐱᒪᑎᓯᐃᐧᓂᐠ ᒋᐅᒋ ᒥᓄᑫᔭᐣ. ᒥᓴᐊᐧᐨ ᐊᔕ ᐁᑭ ᓴᑭᒋᐱᐦᐅᑯᔭᐣ ᑲᓇᐁᐧᐣᑕᑯᓯᐃᐧᓂᐠ ᓇᐣᑕ ᒥᓇ ᐁᐧᐡᑲᐨ ᐁᑭ ᑲᓇᐁᐧᐣᑕᑯᓯᔭᐣ. ᐊᒥᐱᑯ ᐁᐃᓯᓭᐠ, ᐁᐦᐊᔭᔭᐣ ᑭᒪᐡᑲᐃᐧᓯᐃᐧᐣ ᒥᓇ ᐃᐧᒋᐦᐃᑯᐃᐧᓇᐣ ᐃᒪ ᑲᐃᐧ ᐊᓂᔑ ᐱᒋᓂᐡᑲᔭᐣ, ᒥᓇ ᑲᔦ ᒋᑌᐱᓇᒪᓂᐣ ᒥᓇ ᒋᐊᐸᒋᑐᔭᐣ ᓂᑲᐣ ᐃᓇᐱᐣ ᐃᐧᒋᐦᐃᐁᐧᐃᐧᓇᐣ. ᑲᐊᔭᒥᑕᒪᑯ ᑫᒋᓇᐨ ᒋᓂᓯᑐᑕᒪᐣ ᒥᓇ ᒋᐊᐸᒋᑐᔭᓂᐣ ᑭᒪᐡᑲᐃᐧᓯᐃᐧᓇᐣ.
ᐁᑲᐧ ᑕᐡ ᐃᐁᐧ ᑲᐊᓂᔑ ᐱᒋᓂᐡᑲᔭᐣ ᒥᑐᓂ ᑲᐊᓂ ᑭᔑᑭᔭᑌ, ᐊᒥᔕ ᐁᐃᓯᓭᐠ ᑫᑭᐣ ᒋᑲᑫᐧᐣᑌᑕᒪᓂᐣ ᐊᓂᓯᓭᑭᐣ ᐊᐃᐧᔭ ᑲᐱᒥ ᐊᓄᑲᓂᑎᓱᐨ ᑲᐊᓂ ᑭᒋᔭᐦᐊᐊᐧᑎᓯᐨ. ᑲᐱᒥᐦᐃᑯ ᐊᓂᐣ ᐊᐧᔑ ᑲᓇᐊᐧᐸᐣᑕᒪᐣ ᑭᐱᒥᑎᓯᐃᐧᐣ, ᐊᓂᐣ ᑲᔦ ᐁᔑ ᓇᐣᑕᐁᐧᐣᑕᒪᐣ ᒥᓇ ᑲᐃᐧ ᑲᑫᐧ ᑐᑕᒪᐣ ᒋᐅᒋ ᐃᐧᒋᑲᐸᐃᐧᑕᑯᔭᐣ, ᑲᐃᐧᓂᓂᑯ ᑐᑲᐣ ᐊᓂᑭᓇᑲᓇᐣ ᓇᐣᑕ ᒥᓇ ᐅᓂᑭᐦᐃᑯᒪ. ᓂᑭᑫᐣᑕᒥᐣ ᐅᐁᐧ ᒣᑲᐧᐨ ᐁᑲ ᐁᑲᐧᔭᑫᐧᐣᑕᑲᐧᑭᐣ ᐊᓂᐣ ᑫᐃᓯᓭᑭᐣ ᒥᓇ ᑲᔦ ᐁᐡᑲᑦ ᐁᑲ ᐁᑭ ᐃᓯᓭᑭᐣ ᑲᔑ ᓇᐣᑕᐁᐧᐣᒋᑲᑌᐠ ᒋᑭ ᐃᓯᓭᑲᐧᐸᐣ. ᐊᒥᑕᐡ ᐁᐡᑲᑦ ᐁᐃᓯᓭᐠ ᓇᐣᑕ ᓇᐊᐧ ᑭᓇᐧᑲᐡ ᒥᓇ ᒋᓇᓇᑲᒋᒋᑲᑌᐠ ᐃᐁᐧ ᑲᐃᐧ ᐊᓂᔑᐱᒋᓂᐡᑲᔭᐣ ᒋᐅᒋ ᑭᑫᐣᑕᒪᐣ ᑲᔦ ᐁᐡᑲᐨ ᐁᑲ ᑫᑯᐣ ᐁᑭ ᐃᓯᓭᐠ ᒪᔭᑦ ᑲᔑ ᓇᐣᑕᐁᐧᐣᑕᒪᐣ. ᓂᑭᑫᐣᑕᒥᐣ ᑲᔦ ᐁᑲ ᑲᑭᓇ ᐃᐧᒋᐦᐃᑯᐃᐧᓇᐣ ᑲᑭᓇ ᐊᐃᐧᔭ ᐁᑭ ᐃᐧᒋᐦᐃᑯᐨ, ᔕᑯᐨ ᐃᐁᐧ ᑲᔑ ᓇᐣᑕᐁᐧᐣᑕᒪᐣ ᐃᐧᒋᐦᐃᑯᐃᐧᐣ ᒥᐦᐃᐁᐧ ᑫᑲᓇᐊᐧᐸᐣᑕᒪᐠ.
ᑲᑕᓯᑭᐣ ᐃᐧᒋᐦᐃᑯᐃᐧᓇᐣ
ᐊᓂᐣ ᑫᑐᒪᐣ ᐃᐧ ᐅᑕᐱᓇᒪᐣ
ᐃᐧᐅᑕᐱᓇᒪᐣ ᓇᐣᑕ ᒥᓇ ᐊᐊᐧᔑᒣ ᐃᐧᑭᑫᐣᑕᒪᐣ, ᐃᔑᑭᑐᐣ ᓇᑌᑕ ᒥᓇ ᑲᓄᐡ ᑲᐱᐣᑎᑫᓯᓇᐦᐅᐁᐧᐊᐧᐨ ᐃᒪ 1-800-465-3624.
ᑫᑯᓀᓂᐊᐧᐠ ᓂᑲᐣ ᐃᓇᐱᐣ
ᐊᓀᓇᓄᑭᐨ ᑎᑭᓇᑲᐣ ᐅᒪ?
ᐃᐁᐧ ᑲᑲᓇᑌᐣᑕᑲᐧᐠ ᐸᐸᒥᓯᐃᐧᐣ ᑲᐧᔭᐠ ᒋᑭ ᐅᑦᐱᑭᐊᐧᐨ ᑭᓂᒐᓂᔑᓇᐣ ᒥᓇ ᐅᐡᑲᑎᓴᐠ ᒥᓇ ᒋᒪᐡᑲᐊᐧᑭᐣ ᑎᐯᐣᒋᑫᐃᐧᓇᐣ ᐊᒥᐦᐃᒪ ᑭᓇᐃᐧᐣᐟ ᑲᐊᓂᔑᓂᓂᐃᐧᔭᐠ ᑲᐅᐣᒋᓭᐠ ᒋᐊᓂ ᑲᐧᔭᐣᒋᐦᐊᔭᐣᐠ ᑭᓂᒐᓂᔑᓇᐣ ᒥᓇ ᐅᐡᑲᑎᓴᐠ ᐃᔑ ᓂᑲᐣ. ᐃᑫᐧᓂᐊᐧᐣ ᐃᓀᐣᑕᒧᐃᐧᓇᐣ, ᑲᔑ ᐱᒥ ᑐᒋᑲᑌᑭᐣ ᒥᓇ ᑲᑭᒋᓀᐣᑕᑲᐧᑭᐣ ᑲᑭᒋᓀᐣᑕᑲᐧᑭᐣ ᐅᑕᓇᐣᐠ ᒥᐦᐃᒪ ᐁᐧᐣᒋᒪᑲᑭᐣ ᑫᐅᒋ ᒪᐡᑲᐃᐧᓯᔭᐠ ᓄᑯᑦ ᒋᐅᒋ ᔕᔑᐣᑭᒪᔭᐠ ᒥᓇ ᒋᐅᒋ ᑫᒋᓇᐦᐅᔭᐠ ᒋᒥᓄᔭᐊᐧᐨ ᐊᐊᐧᔑᔕᐠ, ᐅᐡᑲᑎᓴᐠ, ᒥᓇ ᑲᐊᓂ ᑭᔑᑭᐊᐧᐠ, ᒥᐦᐃᒪ ᑲᐅᒋ ᒪᐡᑲᐃᐧᑲᐸᐃᐧᒪᑲᐠ ᒥᓇ ᑲᒥᓄᔭᒪᑲᑭᐣ ᑕᔑᑫᐃᐧᓇᐣ. ᓂᑲᐣ ᐃᓇᐱᐣ ᐱᒧᒋᑫᐃᐧᐣ ᐃᒪ ᐅᒋ ᐊᓄᑯᓯᐣ ᑎᑭᓇᑲᐣ ᐊᐊᐧᔑᐡ & ᑎᐯᐣᒋᑫᐃᐧᐣ ᐱᒧᒋᑫᐃᐧᐣ ᒪᒪᐤ ᐅᐱᑭᐦᐊᐊᐧᓱᐃᐧᐣ ᐱᒧᒋᑫᐃᐧ ᒪᓯᓇᐦᐃᑲᐣ, ᑲᐃᑭᑐᒪᑲᐠ “ᑲᑭᓇ ᐁᐃᐧᑕᓄᑭᒥᑎᔭᐠ ᒋᐅᑦᐱᑭᐦᐊᔭᐠ ᑭᓂᒐᓂᔑᓇᐣ.” ᒪᒪᐤ ᐅᑦᐱᑭᐦᐊᐊᐧᓱᐃᐧᐣ ᐅᑭ ᐅᓇᑐᓇᐊᐧᐸᐣ ᐊᓂᔑᓂᓂᐊᐧᐠ ᒥᓇ ᐁᓂᓯᑕᐃᐧᓂᑲᑌᐠ ᑲᔑ ᐃᐧᑐᑲᐊᐧᑲᓄᐊᐧᐨ ᑎᐯᐣᒋᑫᐃᐧᓇᐣ, ᐃᓇᐁᐧᒪᑲᓇᐠ, ᑕᔑᑫᐃᐧᐣ, ᐃᐡᑯᓂᑲᐣ, ᒥᓇ ᑯᑕᑭᔭᐣ ᐃᐧᒋᐦᐃᐁᐧᐃᐧᓇᐣ.
ᐃᐁᐧ ᒪᓯᓂᐱᐦᐃᑲᐣ ᐅᐣᒋ
ᐊᐧᐃᐧᔦᑲᒪᐣᐠ ᐃᐡᑯᓂᑲᐣ ᐅᐡᑲᑎᐡ ᐅᒪᓯᓂᐱᐦᐃᑫ ᒣᒣᑫᐧ ᐊᐱᑕᐃᐧᑭᓯᐠ (ᒪᐧᕑᐃᓱ) ᐅᑭ ᒪᓯᓂᐱᐦᐊᐣ ᓂᑲᐣ ᐃᓇᐱᐣ ᒪᓯᓂᐱᐦᐃᑲᐣ. ᐃᐁᐧ ᐅᔑᐱᐦᐃᑲᐣ ᒧᓱᐡ ᐁᐊᔕᐊᐧᑕᑫᐨ ᐃᒪ ᐊᔕᐊᐧᐣᑕᐁᐧᒧᓂᐣᐠ.
“ᐅᐁᐧ ᓂᒪᓯᓂᐱᐦᐃᑲᐣ ᐃᔑᓇᑲᐧᐣ ᐅᐡᑲᑎᓯᓴᐠ ᐁᑲᑫᐧ ᑭᑫᐣᑕᒧᐊᐧᐨ ᐊᓂᐣ ᑫᑐᑕᒧᐊᐧᐨ ᐊᐱᐣ ᐊᓂᑭᔑᑭᐊᐧᐨ,” ᐃᑭᑐ ᒣᒣᑫᐧ, 16.
ᐃᐁᐧ ᒪᓯᓂᐱᐦᐃᑲᐣ, ᓄᒪᑫ ᐁᑭ ᐱᒥ ᐅᔑᐱᐦᐊᐣᐠ ᒣᒣᑫᐧ ᐊᓂᐣ ᑲᐃᐧ ᐃᔑᓇᑯᑐᐨ ᒥᓇ ᑕᐡ ᓇᐣᑕ ᐁᑕ ᐊᐱᑕᐃᐧᑎᐸᐦᐃᑲᐣ ᐁᑭ ᑭᔑᐱᐦᐊᐣᐠ ᐃᒪ ᐯᐸᓄᐣᐠ, ᐱᓂᐡ ᐊᐱᐣ ᐃᒪ ᐱᐊᐧᐱᑯᐠ ᐁᑭᔑ ᐊᐦᑐᐨ. ᐃᐁᐧ ᒪᓯᓂᐱᐦᐃᑲᐣ ᒪᐣᑭ ᑭᐅᒋ ᐊᐣᑕᓯᓇᐦᐃᑲᑌ ᐃᒪ ᑲᔓᔕᐊᐧᐡᑲᐧᐠ ᐅᑕᓇᐣᐠ, ᐁᑭ ᑕᑯᐱᐦᐊᐣᐠ ᑲᔦ 8 ᑲᐅᒋ ᒪᐡᑲᐃᐧᑲᐸᐃᐧᒪᑲᐠ ᐃᐁᐧ ᐊᔕᐊᐧᐣᑕᐁᐧᒧᐣ, ᒥᓇ ᑲᔦ ᐁᑭ ᒪᓯᓇᐦᐊᐣᑊ ᑲᐃᔑᓂᑲᑌᓂᐠ ᐃᒪ ᑲᔑ ᐊᐧᐃᐧᔦᔭᓂᐣᐠ.
“ᓂᐸᑯᓭᐣᑕᐣ ᐊᐃᐧᔭᐠ ᒋᑭ ᐊᐧᐸᐣᑕᒧᐊᐧᐨ ᐁᐃᐧᐣᒋᑫᒪᑲᐠ ᒪᐡᑲᐃᐧᓯᐃᐧᐣ ᒥᓇ ᑲᔦ ᐁᑲ ᑫᑯᐣ ᑲᔕᐃᐧ ᐸᐣᑭᔑᒥᐁᐧᒪᑲᐠ. ᑕᐱᓇᑲ ᒧᓱᐠ ᒪᐡᑲᐃᐧᓯᐊᐧᐠ ᒥᓇ ᐁᑲ ᑫᑯᓂ ᑲᔕᐃᐧ ᐸᐣᑭᔑᒥᑯᐊᐧᐨ. ᒥᓇ ᑲᔦ ᐅᐱᒪᑎᓴᐠ, ᑐᑲᐣ ᑲᑭᑫᐣᑕᑲᐧᐠ ᒪᐊᐧᐨ ᐁᐊᓂᒪᐠ ᓄᑯᑦ ᑲᐱᒪᑎᓯᓇᓂᐊᐧᐠ ᐅᐁᐧ ᒣᑲᐧᐨ ᑲᐱᒥᐡᑲᒪᑲᐠ ᑭᒋᐊᑯᓯᐃᐧᐣ ᑫᑲᐟ ᐊᔕ ᑲᐊᓂ ᑭᐱᒋᒪᑲᐠ.”
ᐃᐁᐧ ᑲᔑ ᐅᓴᐃᐧᐱᐦᐃᑲᑌᐠ ᑲᔑ ᐊᐧᐃᐧᔦᔭᐠ ᐃᓇᐧᑌ ᐸᐣᑭ ᐁᓇᑲᐧᐠ ᐃᐁᐧ ᐊᓂᔑᓂᓂ ᑲᐊᐸᒋᑐᐨ ᑲᓂᐃᐧᐣᑭᐣ ᑭᑭᓇᐊᐧᒋᒋᑲᓇᐣ. ᐃᐁᐧ ᑲᐅᓴᐊᐧᐠ ᒥᓇ ᑲᐊᐱᑌᐃᐧ ᒥᐡᑲᐧᐠ ᐸᐣᑭ ᑭᐅᒋ ᐊᐣᒋᓇᑯᒋᑲᑌᐊᐧᐣ ᒋᐅᒋ ᒪᒪᐃᐧᓇᑲᐧᐠ ᐃᐁᐧ ᑎᑭᓇᑲᐣ ᐊᐊᐧᔑᐡ ᒥᓇ ᑎᐯᐣᒋᑫᐃᐧᐣ ᐱᒧᒋᑫᐃᐧᐣ ᑲᔑ ᑭᑭᓇᐊᐧᒋᑐᐊᐧᐨ ᐅᒪᓯᓂᐱᐦᐃᑫᐃᐧᓂᐊᐧ. ᐃᐁᐧ ᑲᐅᔕᐊᐧᐡᑲᐧᐠ ᐃᒪ ᓂᑭ ᐅᒋ ᐃᓇᑐᐣ ᑯᑕᐠ ᑎᑭᓇᑲᐣ ᓂᑲᐣ ᑲᐃᐧ ᐊᓄᑲᑕᒧᐊᐧᐨ, ᓂᑲᓂᐡᑲᐃᐧᐣ, ᑲᐃᑭᑐᒪᑲᐠ “ᑲᓂᑲᓂ ᑭᑭᓇᐊᐧᒋ ᒥᑲᓇᐡᑭᑲᑌᐠ ᑫᐊᓂᔑ ᐱᒥᔭᓂᐊᐧᐠ.” ᒣᒣᑫᐧ ᐅᑭ ᒪᓯᓂᐱᐦᐊᐣ ᐃᐁᐧᓂ ᑭᑭᓇᐊᐧᒋᒋᑲᐣ ᓂᑲᓂᐡᑲᐃᐧᐣ, ᑕᑯ ᑲᔦ ᐁᑭ ᐸᑭᑎᓇᑫᐨ ᑲᑭ ᐅᔑᐱᐦᐃᑲᓂᐊᐧᓂᐠ ᒪᒪᓀᐣᒋᑫᐃᐧ ᑭᑭᓄᐦᐊᒪᑫᐃᐧᐣ ᑭᑎᓇᑲᐣ ᑲᑭ ᑐᑕᑭᐸᐣ ᒣᑲᐧᐨ ᑲᑭ ᑭᐸᑯᐡᑲᑯᔭᐠ ᐅᐁᐧ ᑭᒋᐊᑯᓯᐃᐧᐣ ᑲᐸᐸᒥᔭᒪᑲᐠ.
